صوره 6×9 لشاب حوالي 25 سنه مش عازب مش متجوّز
ومبوّز
ف عنيه نظره مابتقولش
شفايفه بحكم التدخين متلوّنه بالليل الكحلي
بالحزن المَحْلِي بشهد العشق شفايفه بتنطق حواديت مفهومه وغامضه
ف ضهر الصوره بتضحك إمضا حبيبته بخبث بناتي:
(حبيبي..حياتي)
صوره 6×9 لشاب حوالي 25 سنه متجوّز
برضه مبوّز
ف عنيه نظره عجيبه بتسأل ببلاهه
باديه عليه إمارات نغنغه ووجاهه
وشّه النابت فوق البدله السينييه
غرقان ف التيه
وف ضهر الصوره بتضحك إمضا حبيبتي بتشفّي:
(جوزي..البيه)
ليست هناك تعليقات:
إرسال تعليق